Satua Tantri (I Yuyu Maupah Kebo Matanduk Mas)

I YUYU MAUPAH KEBO MATANDUK MAS

            Ada katuturan satua Sang Prabhu Jayawikrama. Ida jumeneng natha jagat badrasa karana. kawibhawan idane waluya tejan Hyang Surya satata nyuluhin jagat. Yan kudang tiban suen ida nyeneng agung, laut ida katibenin pakeweh. Tatamanan Ida Sang Prabhu satata karusak Irengan.  Sang prabhu kaliwat duka tur prajani ngandikayang ngamatiang Irengane ento. Para juru boros Idane sranta baan morosin Irengane sakewala tusing ada ane makatang. Ditu laut Ida masasangi, nyen ja ada nyidayang ngamatiang Irengane ento lakar kaicen kebo matanduk mas. Ditu laut ada I Yuyu ane sanggup ngamatiang Irengane ento.

            kacrita yuyune ento suba teked di tongos  Irengane sedek pules di carang kayune ngungukulin tukad. Yuyune laut menek ka carang kayune nyujur Irengane laut ngapit batisne. Irengane tengkejut lantas makecos nanging lacur ulung ka tukade dalem laut mati, Yuyune kaicen kebo matanduk mas. Egar keneh Yuyune maan kebo, kebone abana ka gooknnyane. I Yuyu mula tusing nawang pangunadika.  Dikapan kebo nyidayang macelep ka gowoke sripit. Kanti kenyel Yuyune ngedeng kebone apanga nyidayang macelep. Kebone sayan rengas wireh tusing nyidayang macelep. Gook Yuyune uug. Baas mekelone saling kedeng mawastu bakat enjekina tundun Yuyune nganti I Yuyu mati. Ento ngawinang kayang jani tampak batis kebone kayang jani malaad di tundun yuyune. Nah keto katuturane dugase malu sangkala tundun yuyune matampak batis kebo.

                                                                        Kaketus saking

                                                                        Buku Mandaka Prakarana (LKS Padma IX)